දැඩි කතා බහට ලක්ව ඇති මධ්‍යම අධිවේගය ඉදිකරන වැඩබිමේ තිබෙන කෲඩියා සිලනිකා හෙවත් පඬු කරඳ ගස එම ස්ථානයෙන් ඉවත් නොකොට එය දෙපසින් මාර්ගය ඉදිකිරීමට තීරණය කර ඇති බව වනජීවී හා වනසම්පත් අමාත්‍ය සී. බී. රත්නායක මහතා සඳහන් කර තිබේ. ශාකය කපා ඉවත් කිරීම හෝ වෙනත් තැනක සිටුවීමක් සිදු නොවන බව සඳහන් කරන අතර මේ සම්බන්ධයෙන් උපදෙස් දෙමින් මාර්ග සංවර්ධන අධිකාරිය වෙත ලිපියක් යැවූ බව ද ඔහු සඳහන් කරනවා. පරිසර අමාත්‍ය මහින්ද අමරවීර මහතා ද මේ සම්බන්ධයෙන් එකඟ වී ඇති අතර පසුගිය කැබිනට් මණ්ඩලයට කරුණු වාර්තා කළ බව සහ මාර්ග සංවර්ධන අධිකාරිය වෙත යැවූ ලිපියට ලැබෙන පිළිතුර ඉදිරි කැබිනට් රැස්වීමකට ඉදිරිපත් කරන්නට බලාපොරොත්තු වන බව ද ප්‍රකාශ කර ඇත. ගස ඉවත් කිරීමට එරෙහිව පරිසර වේදීන් සහ තවත් විශාල පිරිසක් දැක්වූ විරෝධතා සහ විද්වතුන්ගේ අදහස්ද සැලකිල්ලට ගනිමින් එම තීරණය ගෙන තිබේ.