ප්‍රධාන මැතිවරණ විකාශන කටයුතු සඳහා මීට පෙර අය කළ ගාස්තුව මෙවර පළාත් පාලන මැතිවරණයේදී සියයට 1300 කින් වැඩි කිරීම අසාධාරණ බවට ශ්‍රී ලංකා විද්‍යුත් විකාශකයන්ගේ සංගමය මැතිවරණ කොමිෂන් සභාවට ලිඛිතව දන්වා තිබේ.

රූපවාහිනී හා ගුවන් විදුලි නාළිකා මැතිවරණ විකාශන පවත්වාගෙන යන්නේ මහජනතාව වෙත තොරතුරු දැන ගැනීමේ අයිතිය තහවුරු කිරීම මත බවත් එය හුදෙක් මුදල් ගෙවා විකාශන කටයුතුවල අයිතිය රැගෙන එයින් ලාභයක් ලැබීමේ අරමුණින් නොවෙන බවත් එම සංගමයේ සභාපති අසංග ජයසූරිය එම ලිපිය මගින් අවධාරණය කරයි.

මැතිවරණ දින උදෑසන සිට සියලුම මාධ්‍ය නාළිකා මැතිවරණය නිදහස්ව සහ සාධාරණව පවත්වාගෙන යාම සඳහා අවශ්‍ය තොරතුරු ජනතාව දැනුවත් කරමින් විශාල පිරිවැයක් වැය කොට සජීව විකාශ පවත්වාගෙන යන අතර එය ප්‍රතිඵල විකාශය දක්වා අඛණ්ඩව දීර්ඝ කිරීමටද විශාල පිරිවැයක් දැරීමට සිදුවේ.

එම නිසා මේ පිළිබද සලකා බලා පසුගිය වසරවල ප්‍රතිඵල විකාශය සඳහා අය කරනු ලැබූ මුදල් ප්‍රමාණය එසේම අයකිරීමට කටයුතු කරන මෙන් එම සංගමය මැතිවරණ කොමිෂන් සභාවෙන් ඉල්ලා සිටියි.