ජනාධිපති අනුර කුමාර දිසානායක පත්වීමෙන් පසු රජයේ වාහන අවභාවිතාවන් හා නීති විරෝධීව එකලැස් කර ඇති වාහන සම්බන්ධයෙන් තොරතුරු ලබාදීමට හඳුන්වා දුන් 1997 ක්ෂණික ඇමතුම් මධ්‍යස්ථානය වෙත ලද පැමිණිලි එකසිය තිහකට වැඩි සංඛ්‍යාවකින් සියයකට වැඩි සංඛ්‍යාවක්ම අසත්‍ය තොරතුරු යැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව පැවැසීය.

නිවැරදි තොරතුරු ලැබී ඇත්තේ 18 ක් පමණක් බවද තොරතුරු 22 ක් සම්බන්ධයෙන් තවදුරටත් විමර්ශන සිදුකෙරෙන බවත් සෙසු සියලු තොරතුරු අසත්‍ය ඒවා බවත් මාධ්‍ය ප්‍රකාශකවරයා කීවේය.

මෙවැනි අසත්‍ය තොරතුරු ලබාදුන් පුද්ගලයන්ට එරෙහිව නීතිය ක්‍රියාත්මක කරන බවද ඔහු කීවේය.

පසුගියදා හිටපු පාර්ලිමේන්තු මන්ත්‍රි සුජීව සේනසිංහගේ නිවසේ නීති විරෝධී ලෙස එකලැස් කළ වාහනයක් ඇතැයි කියන තොරතුරකට අනුව ඔහුගේ නිවස පරීක්ෂාවට ලක්කළ බවද අධිකරණ වරෙන්තුවක් මත එය සිදුකළ බවද මාධ්‍ය ප්‍රකාශකවරයා සඳහන් කළේය.

මන්ත්‍රිවරයාගේ නිවසෙන් මෙදින එවැනි වාහනයක් හමුනොවූ නමුත් එසේ කියා එය අසත්‍යක් යැයි පසෙකට නොදමන බවත් මේ සම්බන්ධයෙන් තවමත් විමර්ශන සිදුකෙරෙන බවත් හෙතෙම කියා සිටියේය.

මේ අතර පසුගිය සෙනසුරාදා තානාපතිවරුන්, රාජ්‍ය තාන්ත්‍රිකයන් මෙන්ම ප්‍රකට ව්‍යාපාරිකයන් පදිංචිව සිටින ෂැන්ග්‍රිලා සුඛෝපභෝගී නිවාස සංකීර්ණයේ වාහනයක බෝම්බයක් ඇති බවට ලද තොරතුරකට අනුව පරීක්ෂා කිරීමක් කළ බව මාධ්‍ය ප්‍රකාශකවරයා කියා සිටියේය.

එවැනි බෝම්බයක් ද එදින හමු නොවූ බවත් මෙය අධිකරණ සෝදිසි වරෙන්තු මත සිදුනොකළේ එය භයානක තොරතුරක් නිසා බවත් පොලිස් මාධ්‍ය ප්‍රකාශකවරයා කියා සිටියේය.

රජයේ ප්‍රවෘත්ති දෙපාර්තුමේන්තුවේ ඊයේ (06 වැනිදා) පැවැති කැබිනට් තීරණ ප්‍රකාශ කිරීමේ මාධ්‍ය හමුවේදී කළ ප්‍රශ්නයකට පිළිතුරු දෙමින් මාධ්‍ය ප්‍රකාශකවරයා මේ බව කියා සිටියේය.