රාජ්‍ය අංශයේ පුරප්පාඩු 30,000 ක් පිරවීමේ වැඩසටහන යටතේ සෞඛ්‍ය අමාත්‍යාංශයේ හෙද නිලධාරීන් 3,147 ක් බඳවා ගැනීමට කැබිනට් මණ්ඩල අනුමැතිය ලබාදී ඇත.

මීට පෙරදී කැබිනට් මණ්ඩලය විසින් අනුමැතිය ලබාදී තිබුණේ හෙද නිලධාරීන් 2,218 ක් බඳවා ගැනීම සඳහාය.

වෛද්‍ය කර්මය සඳහා වූ පරිපූරක වෘත්තිකයන් බඳවා ගැනීමට පසුගිය වසර පහක කාලයක් තිස්සේ කටයුතු කර නොතිබූ බවත්,දැනට පවතින පුරප්පාඩු පවතින හෙයින් ඔවුන් බඳවා ගැනීමට රජය තීරණය කළ බව කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස පැවසීය.

රජයේ ප්‍රවෘත්ති දෙපාර්තමේන්තුවේ ඊයේ (02 වැනිදා) පැවැති කැබිනට් තීරණ දැනුම්දීමේ මාධ්‍ය හමුවේදී ඔහු මේ බව කියා සිටියේය.

රාජ්‍ය සේවා කොමිෂන් සභාවේ අනුමැතිය යටතේ ශ්‍රවණවේදී කාර්මික ශිල්පීන් දැනට 23 දෙනකු බඳවාගෙන තිබෙන බවත්,එම පුරප්පාඩු 28 ක් පැවැති බවත්,පුරප්පාඩුවලට වඩා අයැදුම්කරුවන් සංඛ්‍යාව අඩු නිසා එම අයැදුම්කරුවන් 23 දෙනා රාජ්‍ය සේවයට බඳවා ගැනීමට කටයුතු කළ බවද ඇමැතිවරයා කීවේය.

විකිරණ ශිල්පීන් සඳහා පුරප්පාඩු 399ක් පැවැති බවත්,අයැම්කරුවන් 118 ක් පමණක් සිටි නිසා ඔවුන් සියලුදෙනාම ඉකුත් පෙබරවාරි මාසයේදී බඳවාගත් බවද ඇමැතිවරයා පැවසුවේය.

වෛද්‍ය රසායනාගාර කාර්මික විද්‍යාඥයන්ගේ පුරප්පාඩු 294 ක් තිබෙන බවත්, ඊට අදාළව අයැදුම්පත් 354 ක් ලැබී ඇති බවත්,භෞත චිකිත්සකයන් පුරප්පාඩු 203ක් පැවැතියද,අයැදුම්පත් 277ක් ලැබී ඇති බවත්,වාග් චිකිත්සකයන් පුරප්පාඩු 57ක් පවතින බවත්,ඒ සඳහා අයැදුම්පත් 168ක් ලැබී ඇතැයිද ඔහු කීවේය.

පුරප්පාඩුවලට වඩා අයැදුම්පත් වැඩියෙන් ලැබී තිබෙන රැකියා සඳහා විභාගයක් පවත්වා සුදුස්සන් තෝරා ගන්නා බවද ඇමැතිවරයා පැවසීය.

වසර හතරක උසස් පෙළ හැදෑරූ පිරිස මෙහි සිටින බවත්, මෙම විභාග මෙමස අග සතියේදී පැවැත්වීමට සෞඛ්‍ය අමාත්‍යාංශය කටයුතු යොදා ඇතැයිද ඔහු කීවේය.